Manila – Naglalaro ngayon ang Senado sa maselang usapin matapos aprubahan ang paglilipat ng kustodiya kay dating Department of Public Works and Highways (DPWH) Bulacan Assistant District Engineer Brice Hernandez mula sa PNP Custodial Center patungong Pasay City Jail. Ngunit sa panig ng Kamara, malinaw ang pagtutol at pagkabahala ni House Committee on Infrastructure and Communications Co-Chair Rep. Terry Ridon, na nagsabing hindi dapat ipagsawalang-bahala ang posibleng panganib na dala ng desisyon.

Ayon kay Ridon, hindi makatwiran na baguhin ang dating napagkasunduan na sa Senado mananatili si Hernandez. Aniya, ang kapaligiran sa Pasay City Jail ay ibang-iba kumpara sa mas kontroladong seguridad ng Senado, kaya’t mas mataas ang posibilidad ng banta sa kanyang kaligtasan. Dagdag pa ng mambabatas, hindi lamang buhay ng isang indibidwal ang nakataya, kundi pati na rin ang kredibilidad ng imbestigasyon hinggil sa umano’y iregularidad sa flood control projects.

“Ang tanong dito ay bakit biglang nagbago ang desisyon? Kung tunay na layunin ng Senado ang protektahan ang integridad ng kanilang imbestigasyon, dapat malinaw ang kanilang mga hakbang. Sa puntong ito, ang kanilang naging pasya ay nagbubukas ng agam-agam at duda,” pahayag ni Ridon.

Binanggit din ng kongresista na ang pagkakaaresto kay Hernandez ay nagbigay ng oportunidad sa mga mambabatas na makakuha ng mas malalim na impormasyon hinggil sa sistematikong katiwalian sa ilang proyekto ng DPWH. Ngunit sa desisyong ilipat siya sa karaniwang kulungan, maaaring malagay sa alanganin ang kanyang posisyon bilang potensyal na testigo. “Kapag nawalan ng tiwala ang mga testigo, mawawalan din ng saysay ang buong proseso ng pagdinig,” dagdag pa niya.

Samantala, iginiit ng kampo ni Hernandez na ang paglilipat ay “retaliatory” at “highly suspect,” bagay na lalong nagpapatibay sa pangamba ni Ridon na may ibang interes na gumagalaw sa likod ng desisyon ng Senado. Nanawagan ang kongresista sa pamunuan ng Senado na magbigay ng malinaw at makatuwirang paliwanag, hindi lamang para sa kapakanan ni Hernandez, kundi para rin sa tiwala ng publiko sa institusyon.

Sa huli, iginiit ni Ridon na hindi dapat isakripisyo ang kaligtasan at karapatan ng mga indibidwal na nasa sentro ng malalaking imbestigasyon. “Kung hindi kayang tiyakin ng Senado ang seguridad ng isang testigo, paano natin mahihikayat ang iba na magsalita at maglabas ng katotohanan?” ani pa niya.

Larawan mula sa House Representatives Ph