MANILA — Nakarekober ang mga tauhan ng NBI-Organized and Transnational Crime Division (OTCD) ng mga dokumento at cash mula sa condominium unit ni dating Ako Bicol Party-List Representative Zaldy Co sa Bonifacio Global City, Taguig, matapos magsagawa ng operasyon noong gabi ng Disyembre 11.

Ayon kay NBI spokesperson Atty. Palmer Mallari, matagumpay ang operasyon at nakakuha sila ng mga dokumentong maaaring maging mahalagang ebidensya sa mga kasong isasampa laban kay Co. 

“Somehow we will be able to cross-reference these documents to those we already have. At the same time, pwe-pwede ikumpara doon sa mga statements earlier given by witnesses who came forward and offered testimonies. Para malaman natin at magagamit ba ito sa ating pag fa-file ng kaso,” ani Mallari.

Batay sa ulat ng Tempo at Pinoy Publiko, natagpuan ang mga dokumento sa loob ng tatlong vaults sa unit ni Co. Bagama’t hindi pa isinasapubliko ang eksaktong nilalaman, inaasahang makakatulong ang mga ito sa pagpapatibay ng kaso kaugnay ng umano’y anomalous flood control projects na nagkakahalaga ng daan-daang milyong piso.

Bukod sa mga dokumento, nakarekober din ang NBI ng maliit na halaga ng cash. Hindi pa malinaw kung ito ay direktang konektado sa mga kasong kinakaharap ni Co, ngunit bahagi ito ng mga ebidensyang isinailalim sa pagsusuri ng mga awtoridad.

Ang operasyon ay isinagawa kasabay ng mas pinaigting na hakbang ng NBI laban kay Co, na idineklara ng Sandiganbayan bilang “fugitive from justice” matapos ang mga kasong graft at malversation kaugnay ng umano’y substandard na ₱289-milyong road dike project. Noong Nobyembre 23, naghain na rin ang NBI ng kahilingan sa Interpol para sa red notice laban kay Co, na kasalukuyang pinoproseso.

Sa ngayon, patuloy ang imbestigasyon ng NBI at inaasahang magsisilbing mahalagang bahagi ng kaso ang mga nakuhang dokumento at cash. Ang mga ebidensya ay inaasahang makakatulong sa pagbuo ng mas matibay na kaso laban sa dating kongresista, na matagal nang iniugnay sa malawakang katiwalian sa flood control projects.

Larawan mula NBI