MANILA, Philippines — Naglabas ng public advisory ang Land Transportation Office (LTO) kaugnay ng pansamantalang internet connectivity issues na nararanasan sa ilang piling LTO District Offices sa iba’t ibang panig ng bansa. Ayon sa ahensya, ang problema ay nag-ugat sa kanilang Internet Service Provider na gumagamit ng MPLS service, na nagdulot ng pagkaantala sa internet connection sa ilang tanggapan.

Nilinaw ng LTO na hindi apektado ang Land Transportation Management System (LTMS) mismo. Gayunman, dahil sa internet disruption, inaasahan ang panandaliang pagkaantala sa pagproseso ng mga transaksyon sa mga district office na tinamaan ng problema. Kabilang sa mga maaaring maantala ang pagproseso ng rehistro ng sasakyan, lisensya, at iba pang serbisyong nangangailangan ng online connectivity.

Ayon pa sa LTO, aktibong nakikipag-ugnayan ang kanilang technical team sa Internet Service Provider upang maibalik sa normal ang koneksyon sa lalong madaling panahon. Kapag naayos na ang internet service, inaasahan ding babalik sa normal ang daloy ng mga transaksyon sa mga apektadong tanggapan.

Humingi naman ng paumanhin ang ahensya sa publiko sa abalang maaaring idulot ng pansamantalang downtime at humiling ng pang-unawa at pasensya mula sa mga kliyente. Pinayuhan ang mga motorista at transacting public na makipag-ugnayan muna sa kanilang pinakamalapit na LTO District Office o subaybayan ang mga opisyal na anunsyo ng LTO para sa mga update bago magtungo sa mga tanggapan. Tiniyak ng LTO na ginagawa ang lahat ng kinakailangang hakbang upang maresolba agad ang isyu at mapanatili ang maayos at episyenteng pagbibigay ng serbisyo sa publiko. (Larawan: LTO / Facebook)