DISYEMBRE 15, 2025 — Muling inaasahang dudagsain ng libu-libong manonood ang Grand Parade of Stars ng Metro Manila Film Festival (MMFF) sa Biyernes, na magdudulot ng malawakang pagbabago sa daloy ng trapiko sa Makati at Pasay.

Ayon sa Metropolitan Manila Development Authority (MMDA), ipatutupad ang rerouting mula 12:01 ng tanghali hanggang 10:00 ng gabi sa mga pangunahing kalsada kabilang ang Macapagal Boulevard, Sen. Gil Puyat Avenue, Ayala Avenue, Makati Avenue, J.P. Rizal Street, at A.P. Reyes Avenue.

“Motorists will be made to stop intermittently on specific lanes to allow the parade to pass quickly, then traffic is resumed,” pahayag ng MMDA. 

(Pansamantalang pahihintuin ang mga motorista sa piling linya upang makadaan agad ang parada bago muling ibalik ang trapiko.)

Mga alternatibong ruta

Mula Macapagal Boulevard/Mall of Asia/Cavite: maaaring dumaan sa Seaside Boulevard, Diokno Boulevard, Atang De la Rama Street, Vicente Sotto Street, Jalandoni Street, at Pedro Bukaneg Street.

Mula Edsa: maaaring gamitin ang J.P. Rizal Avenue patungong Rockwell at Kalayaan Avenue (one-way traffic), o kaya’y A. Mabini Street, Zamora Street, at Commando Bridge.

Sa hilagang bahagi ng Macapagal Boulevard ilalagay ang mga float, tent, at entablado, habang sa katapat na direksiyon naman titipon ang mga manonood. Mula rito, daraan ang parada sa Gil Puyat Avenue, Ayala Avenue, Makati Avenue, J.P. Rizal Street, at A.P. Reyes Avenue bago magtapos sa Circuit Makati.

Tinatayang aabot sa 1 oras at 40 minuto ang kabuuang takbo ng parada na may habang 8.4 kilometro. Pagkatapos nito, magkakaroon ng meet-and-greet, programa, at mga pagtatanghal sa Circuit Makati.

Pinapayuhan ng MMDA ang publiko na maglaan ng mas mahabang oras sa biyahe at planuhin nang maaga ang ruta upang makaiwas sa mabigat na trapiko.

(Larawan: Wikipedia)