Manila - Matagumpay na naisagawa ng Globe Telecom, katuwang ang subsidiary nitong Fiber Infrastructure and Network Services Inc. (FINSI), ang isang makasaysayang field trial gamit ang Google TAARA technology na nakapagtala ng hanggang 10 gigabits per second (Gbps) na bilis ng internet.

Isinagawa ang pagsusubok sa pamamagitan ng Free Space Optics (FSO) system—isang teknolohiya na gumagamit ng laser light beams para magpadala ng data, nang hindi na kailangan ng fiber cables o licensed spectrum. Sa naturang trial, nagawa ng Globe na maipadala ang high-speed data sa layo na 11 kilometro na tumawid mismo sa Laguna Lake, isang lugar na mahirap lagyan ng tradisyunal na linya ng komunikasyon.

Ayon kay Gerhard Tan, senior director at head ng technology strategy and innovations ng Globe, ang resulta ng trial ay patunay ng kanilang pagtutulak para sa “future-ready at cost-effective transport solutions” na madaling maipatutupad saan mang lugar sa bansa.

Sumailalim ang sistema sa masusing pagsusuri kabilang ang Enhanced RFC2544 test suite at 24-oras na Bit Error Rate Test (BERT), kung saan matagumpay nitong nakapasa sa lahat ng pamantayan ng kumpanya.

Malaki rin ang papel ng FINSI sa aktwal na pag-deploy ng teknolohiya. Ibinahagi ni Xerxes Jonash Sta. Ana, general manager ng FINSI, na aktibong nakilahok ang kanilang engineering team upang masiguro ang matagumpay na pagpapatakbo ng TAARA system.

Itinuturing ng Globe ang resulta bilang mahalagang hakbang upang tugunan ang connectivity gap sa mga lugar na mahirap maabot ng fiber network, partikular na sa mga liblib na komunidad at isla sa bansa.

Ang pagsubok na ito ay karagdagan sa mga makabagong proyekto ng Globe ngayong taon, kabilang ang matagumpay na pilot test ng 50GPON technology na kayang magbigay ng hanggang 50 Gbps para sa residential at enterprise users, at ang kauna-unahang live trial ng 5G-Advanced sa bansa na nakapagtala ng 2.5 Gbps download speed.

Sa tuloy-tuloy na inobasyon, layon ng Globe na mapalawak ang abot at kalidad ng internet services sa Pilipinas, at maisama ang bansa sa hanay ng mga bansang gumagamit ng pinakamodernong teknolohiya sa telekomunikasyon.