MANILA, Philippines — Magsasagawa ng malawakang recruitment ang Department of Public Works and Highways (DPWH) sa iba’t ibang paaralan sa buong bansa simula Enero 2026, bilang bahagi ng mas pinaigting na reporma sa ahensiya.

Ayon kay DPWH Secretary Vince Dizon, pangunahing target ng recruitment drive ang mga inhinyero at accountant na makatutulong sa pagpapalakas ng teknikal at administratibong kakayahan ng kagawaran. Aniya, mahalagang mapunan ng mga kwalipikado at may integridad na propesyonal ang hanay ng DPWH upang mas mapabilis at mapahusay ang pagpapatupad ng mga proyektong pang-imprastruktura ng pamahalaan.

“I need fresh blood,” diin ni Sec. Dizon, sabay sabing personal siyang mag-iikot sa mga unibersidad at kolehiyo upang hikayatin ang mga potensyal na aplikante na pumasok sa serbisyo publiko. Ayon sa kalihim, nais niyang direktang makausap ang mga kabataang propesyonal upang ipaliwanag ang papel ng DPWH sa nation-building at ang mga repormang nais niyang ipatupad sa ahensiya.

Layunin ng recruitment drive na makahikayat ng mga bagong kawani na may sariwang pananaw, makabagong kaalaman, at malasakit sa bayan, lalo na sa gitna ng patuloy na pagpapatupad ng malalaking infrastructure projects sa ilalim ng kasalukuyang administrasyon. Dagdag pa ni Dizon, bukas ang DPWH sa mga aplikanteng handang magsilbi nang tapat at propesyonal, at nais maging bahagi ng pagbabago sa gobyerno. Inaasahan naman na maglalabas ang ahensiya ng karagdagang detalye hinggil sa mga kwalipikasyon, iskedyul, at proseso ng aplikasyon sa mga susunod na linggo. (Larawan: Wikipedia)