December 18, 2025 — Isang 22-anyos na office worker sa Alicante, Spain ang natanggal sa trabaho dahil sa kakaibang dahilan: palagi siyang pumapasok nang sobrang aga sa opisina, bagay na ikinainis ng kanyang boss.

Ayon sa ulat, ang empleyado ay nakasanayang dumating sa opisina bandang 6:45 hanggang 7:00 a.m., kahit na ang kanyang shift ay nagsisimula pa lamang sa 7:30 a.m.. Sa halip na purihin ang kanyang pagiging maagap, itinuring ito ng management bilang “excessive punctuality” na nakakaistorbo sa operasyon at tila pagsuway sa direktiba ng kumpanya.

Batay sa mga ulat, ilang beses nang pinaalalahanan ng kanyang boss ang empleyado na huwag masyadong agahan ang pasok. Nakapagtala pa umano ng verbal at written warnings mula pa noong 2023, ngunit patuloy pa rin ang kanyang maagang pagdating. Dahil dito, nagpasya ang kumpanya na tuluyan na siyang sibakin.

Ang insidente ay nagdulot ng malawak na diskusyon online. Maraming netizens ang nagtaka kung bakit naging problema ang pagiging maagap, samantalang sa maraming kultura ay itinuturing itong magandang asal sa trabaho. Gayunpaman, ipinaliwanag ng kumpanya na ang maagang pagdating ng empleyado ay nagdudulot ng irritation sa boss dahil wala pa siyang nakatalagang gawain sa oras na iyon, at nakikita itong defiance kaysa dedikasyon.

Sa ilalim ng labor laws sa Spain, pinapayagan ang mga employer na magpatupad ng “reasonable company rules” upang mapanatili ang kaayusan at produktibidad. Sa kasong ito, iginiit ng kumpanya na ang paulit-ulit na paglabag sa kanilang patakaran ang naging batayan ng dismissal.

Samantala, sa Pilipinas, binigyang-diin ng mga eksperto na ang Labor Code ay hindi tahasang naglilista ng “tardiness” o “excessive punctuality” bilang batayan ng disciplinary action, ngunit pinapayagan ang mga employer na magtakda ng makatuwirang regulasyon. Ang kaso sa Spain ay nagsilbing halimbawa ng kakaibang interpretasyon ng “workplace discipline” na nagdulot ng matinding reaksyon mula sa publiko.

Para sa maraming netizens, ang pangyayaring ito ay paalala na ang workplace culture ay maaaring magkaiba-iba depende sa bansa at sa pamunuan ng kumpanya. Sa halip na makita bilang dedikasyon, ang sobrang aga ng empleyado ay naging dahilan ng kanyang pagkakatanggal.