JUBAN, SORSOGON — Tatlong indibidwal ang sugatan matapos ang banggaan ng isang tricycle at utility vehicle sa Barangay Cogon, Juban, Sorsogon bandang alas-9:30 ng gabi.

Ayon sa ulat ng mga awtoridad, galing umano sa Matnog, Sorsogon ang utility vehicle at patungong Cavite nang mangyari ang insidente. Minamaneho ito ng isang 47-anyos na lalaki na residente ng Samar. Samantala, tinatahak naman ng tricycle ang outer northbound lane at tumatawid patungo sa southbound lane nang mangyari ang salpukan.

Dahil sa lakas ng impact, nagtamo ng mga sugat sa iba’t ibang bahagi ng katawan ang tatlong sakay ng tricycle na pawang mga residente ng Barangay Cogon at Aroroy, Juban. Agad silang isinugod sa pagamutan para sa agarang lunas.

Sa kabutihang-palad, hindi nasaktan ang mga driver ng dalawang sasakyan. Patuloy naman ang isinasagawang imbestigasyon ng Juban Municipal Police Station upang matukoy ang sanhi ng aksidente at kung may pananagutan ang alinmang panig sa insidente. (Larawan: Sorsogon Police Provincial Office / Facebook)