Maynila — Muling bubusisiin ng Pilipinas at Japan ang posibleng epekto ng malakas na lindol mula sa West Valley Fault sa pamamagitan ng isang malawakang pag-aaral na nakatakdang simulan sa taong 2026. Ito ay bahagi ng muling pagbuhay sa tinaguriang Metro Manila Earthquake Impact Reduction Study (MMEIRS) na unang isinagawa noong 2004 sa tulong ng Japan International Cooperation Agency (JICA).

Layunin ng proyekto na masuri ang mga pagbabago sa panganib na dulot ng “The Big One,” o ang tinatayang magnitude 7.2 na lindol, lalo na sa Metro Manila at kalapit na probinsya. Ayon sa mga eksperto, lumobo na nang husto ang populasyon sa Kalakhang Maynila sa nakalipas na dalawang dekada, dahilan upang mas tumaas ang antas ng banta at inaasahang pinsala kung sakaling tumama ang naturang malakas na lindol.

Sa pahayag ni Dr. Teresito Bacolcol, direktor ng Philippine Institute of Volcanology and Seismology (PHIVOLCS), tinatayang aabot sa 33,000 katao ang posibleng masawi sa Metro Manila, at maaaring pumalo hanggang 48,000 kung isasama ang mga karatig-lugar. Bukod dito, higit 114,000 indibidwal ang maaaring magtamo ng pinsala o masugatan. Maliban sa human casualties, malaki rin ang posibilidad ng pagkasira ng mga gusali, imprastruktura, at mga pangunahing pasilidad tulad ng ospital, kalsada, at tulay.

Dagdag pa ng PHIVOLCS, mas magiging detalyado ang bagong risk assessment dahil mas marami nang datos at teknolohiya ang maaaring magamit ngayon kumpara noong 2004. Ang resulta ng pag-aaral ay inaasahang magsisilbing batayan ng mga ahensya ng gobyerno, lokal na pamahalaan, at pribadong sektor sa pagpapatupad ng mas konkretong hakbang sa disaster preparedness at response.

Ang JICA ang sasagot sa pondo para sa proyekto, samantalang ang Pilipinas naman ay maglalaan ng kaukulang datos at suporta para sa implementasyon ng pag-aaral. Inaasahan na makukumpleto ang pagsusuri sa loob ng dalawang taon, bago matapos ang dekada.

Binigyang-diin din ng mga eksperto na hindi maiiwasan ang paggalaw ng West Valley Fault, na dumadaan sa ilang bahagi ng Metro Manila at mga karatig na lalawigan. Dahil dito, mahalaga ang tuloy-tuloy na paghahanda upang mabawasan ang inaasahang pinsala at maprotektahan ang mas malaking bahagi ng populasyon.

Kasabay ng naturang proyekto, nanawagan ang mga disaster officials sa publiko na huwag maging kampante. Pinayuhan ang lahat na makilahok sa mga earthquake drill, tiyaking matibay ang mga tirahan at gusali, at maging handa sa mga pangunahing pangangailangan tulad ng pagkain, tubig, at first aid kit sakaling mangyari ang malakas na lindol.

Sa inaasahang pag-revisit ng MMEIRS sa 2026, umaasa ang mga eksperto na mas magiging komprehensibo ang paghahanda ng bansa laban sa panganib ng “The Big One,” na matagal nang nakikitang isa sa pinakamalaking banta sa kaligtasan ng milyun-milyong Pilipino.

Larawan mula sa Shadow1 Expedition